DERMAYON,(Fokuspantura.com),- Rencana pemerintah Dermayu bakal nerapna aturan Pembatasan Sosial Berskala Besar (PSBB) minggu – minggu arep, ternyata akeh sing bli difahami wong Dermayu apa kuen PSBB. Padahal kudune aturan PSBB diterapna, masyarakat faham bener apa sing kudu di perhatikna masyarakat supaya bisa nyegah lan ngindari Virus Corona.
Ning suasana ulan puasa, akeh anjuran agama lan perintah pengeran sing dilanggar karena ngadepi masa panen raya, apa maning kuen anjuran sifate gawean menusa alias pemerentah, ora bakal kabeh rayat dermayu nurut aturan PSBB mengko.
“ Lamon bli melu panenan, anak anakan kita garep dipakani apa ?,” jare Tarmudi wong tani Redalem, Balongan, waktu obrolan ning pinggir dalan, Minggu,(3/5/2020).
Jarene, suasana panenan ora bakal bisa di cegah, supaya rayat aja pada meng sawah misale, sebab memang saat sekien cuma usaha luru derepan kanggo nyumponi kebutuhan gal dinane. Apamaning jarene lelungahan wis blolih, bahkan anake deweke sing lagi meratau wis kudu balik malah ora bisa balik ning dalane dicegati polisi. Padahal deweke ngarepaken kiriman duit sing anake kanggo nyukupi jajan sedinane, tapi boro – boro anak bisa ngirimi go ning umah, kebutuhan deweke bae ning perantauan embuh cukup embuh beli.
“Dadi kula si ora ngerti PSBB kuh apa, lamon sukiki kon ngarit pari ning blok jeramba ya ngerti,” ngomonge.
Kondisi niku, ternyata ora bisa dianggep sepele, priwe peran pemerintah Dermayu kanggo upaya ngupai wara – wara ning kabeh rayat supaya target kanggo nyegah lan ngindari wabah Corona bisa sukses lan ora ana dampak serius kanggo masyarakat Dermayu.
